ესპანური ეპოქა ქართულ ხელბურთში: ნაკრებს რუბენ გარაბაია უხელმძღვანელებს

საქართველოს ხელბურთელთა ნაკრების სათამაშო ხელწერაში თუ ესპანურ შტრიხებს აღმოაჩენთ, ეს ახალი მწვრთნელისა და მისი თანაშემწეების დამსახურება იქნება. დღეიდან საქართველოს ხელბურთელთა ეროვნული ნაკრების მთავარი მწვრთნელი ოფიციალურად 47 წლის ესპანელი სპეციალისტი, რუბენ გარაბაიაა. იგი სამწვრთნელო შტაბთან ერთად სასტუმრო „პულმანში“ საქართველოს ხელბურთის ეროვნული ფედერაციის პრეზიდენტმა, ვახტანგ მეიფარიანმა წარადგინა.

ნაკრების მთავარი მწვრთნელის თანაშემწეები პაბლო კამპოსი და ხავიერ სალვადორი იქნებიან, რომლებსაც საქართველოს ასაკობრივ გუნდებთან მუშაობის გამოცდილება უკვე აქვთ. გარდა ამისა, მეკარეების მწვრთნელის რანგში მუშაობას კვლავაც გააგრძელებს შოთა თევზაძე.

„თავდაპირველად მთავარი მწვრთნელის პოსტზე ათ კანდიდატს შორის ვარჩევდით. შევჩერდით ორზე, საბოლოო არჩევანი კი რუბენ გარაბაიაზე გავაკეთეთ. ასე რომ, ეროვნული ნაკრებისთვის იწყება ახალი ეტაპი, რომელსაც რუბენ გარაბაია უხელმძღვანელებს, — განაცხადა ვახტანგ მეიფარიანმა. — ესპანელმა სპეციალისტმა უკვე წარადგინა სამწვრთნელო შტაბი და განვითარების გეგმა. რაც მთავარია, მიდგომა არის სისტემური და კომპლექსური. დაინერგება ახალი სტანდარტები, რაც სპორტსმენებს უწყვეტი განვითარების შესაძლებლობას მისცემს, ყოველივე ეს კი ხელს შეუწყობს ახალგაზრდა მოთამაშეების ინტეგრაციას ეროვნულ გუნდში.

დარწმუნებული ვარ, ახალი მწვრთნელების გამოცდილებით, ჩვენი ბიჭების მონდომებითა და ნიჭით, ეროვნული ნაკრები წარმატებით იასპარეზებს ევროპის ჩემპიონატის საკვალიფიკაციო მატჩებში და ზედიზედ მესამედ მოიპოვებს ფინალური ეტაპის საგზურს. შემუშავებული გვაქვს ოთხწლიანი პროგრამა, თუმცა მისი გადახედვა ყოველწლიურად მოხდება. ამ ეტაპზე გაფორმებული გვაქვს ერთწლიანი ხელშეკრულება, რათა მიმდინარე ციკლი დავასრულოთ. იმედი გვაქვს, რომ შემდგომი ოთხი წელი წარმატებული იქნება როგორც ეროვნული, ისე ასაკობრივი ნაკრებებისთვის“.

ეროვნული ფედერაციის პრეზიდენტმა ასევე აღნიშნა, რომ ქართული ხელბურთი სრულად გადაერთო ესპანურ პროგრამაზე. კერძოდ, 12-დან 16 წლამდე მოზარდთა დასაოსტატებლად პროცესში ჩართული იქნება „ბარსელონას“ აკადემია, ხოლო 16 წლამდე და ახალგაზრდული ნაკრებების განვითარებაზე რუბენ გარაბაია და მისი შტაბი იზრუნებენ:

„ესპანელი სპეციალისტები ჩვენი ასაკობრივი ნაკრების მწვრთნელებს კონსულტაციებს გაუწევენ. რაც შეეხება „ბარსელონას“ აკადემიას, მათი წარმომადგენლები ექვს თვეში ერთხელ ჩამოვლენ ჩვენი გოგონებისა და ბიჭების გადასამზადებლად, ასევე მწვრთნელებისთვის ტრენინგების ჩასატარებლად“.

ფედერაციის ვიცე-პრეზიდენტმა ლევან სალუქვაძემ აღნიშნა, რომ რუბენ გარაბაიას თანაშემწეები პაბლო კამპოსი და ხავიერ სალვადორი ქართულ ხელბურთს წლებია იცნობენ და ადაპტაცია არ გაუჭირდებათ. ასევე მნიშვნელოვანია, რომ სამუშაოს გაუადვილებენ ახალ მთავარ მწვრთნელს.

საქართველოს ნაკრების მთავარმა მწვრთნელმა, რუბენ გარაბაიამ, მისასალმებელი სიტყვა ფედერაციის მიმართ მადლობით დაიწყო და აღნიშნა, რომ მისი უმთავრესი მიზანი ქართველი გულშემატკივრის კმაყოფილებაა:

„პირველ რიგში, მინდა მადლობა გადავუხადო ფედერაციას ნდობისთვის. ბედნიერი ვარ, რომ შევუერთდი გუნდს, რომელიც ბოლო წლებში საგრძნობლად გაიზარდა და მნიშვნელოვან წარმატებებს მიაღწია. მე და ჩემი სამწვრთნელო შტაბი დარწმუნებულები ვართ, რომ გუნდის შემდგომ განვითარებაში დიდ წვლილს შევიტანთ. ასევე, ძალზე სასიამოვნოა, რომ ჩართული ვიქნები ფედერაციის პროექტში, რომელიც ახალგაზრდა მოთამაშეების ზრდა-განვითარებას ითვალისწინებს. ჩვენი მხრივ, არ დავიშურებთ ძალისხმევასა და გამოცდილებას, რათა გავაუმჯობესოთ სათამაშო სტილი და სტაბილურად ვიასპარეზოთ ევროპისა და მსოფლიო ჩემპიონატებზე. ამასთანავე, შევეცდებით მაქსიმალურად გამოვიყენოთ თითოეული მოთამაშის პოტენციალი.

გავაგრძელებ იმ პროგრამას, რომლითაც პაბლო კამპოსი და ხავიერ სალვადორი ხელმძღვანელობენ. მათ უკვე გამაცნეს გაწეული სამუშაო. რა თქმა უნდა, ჩემი უმთავრესი საზრუნავი ეროვნული ნაკრებია, თუმცა მწვრთნელებისთვის ერთობლივ პროგრამასაც შევიმუშავებთ. საბოლოო მიზანი კი ისაა, რომ გულშემატკივარი ნაკრების თამაშითა და შედეგებით კმაყოფილი იყოს“.

ცნობისთვის, რუბენ გარაბაია ნაკრების წევრებთან და კანდიდატებთან გაცნობით შეკრებას უკვე შეუდგა. პარასკევს მედიისთვის ღია ვარჯიშია დაგეგმილი.