ევროპის 2024 წლის ჩემპიონატი
დიუსელდორფში გამართულ კენჭისყრას საქართველოს ხელბურთის ეროვნული ფედერაციის პრეზიდენტი ვახტანგ მეიფარიანი და მარკეტინგის მენეჯერი თამარ ჩოგოვაძე ესწრებოდნენ.
კენჭისყრის შედეგად გამოვლინდა ექვსივე ჯგუფი, რომელთაგან E ჯგუფში საქართველოს ეროვნული ნაკრები შვედეთს, ნიდერლანდებს და ბოსნია ჰერცეგოვინას დაუპირისპირდება.
შვედეთი წლების განმავლობაში მოწინავე პოზიციებისთვის იბრძვის. გუნდს 11 მსოფლიო ჩემპიონატის მედალი აქვს (4 ჯერ გახდა ჩემპიონი, 3 ჯერ ვერცხლის პრიზიორი, 4 ჯერ ბრინჯაოს პრიზიორი). გარდა ამისა, შვედეთი ევროპის ხუთგზის ჩემპიონია, რომელმაც ბოლო ჩემპიონობა 2022 წელს იზეიმა და ტიტულის დაცვას გერმანიაში შეეცდება.
გუნდის წამყვანი მოთამაშეები:
ჯიმ გოტფრიდსონი (გამთამაშებელი)
SG Flensburg-Handewitt
2023 წლის მსოფლიო ჩემპიონატის საუკეთესო მოთამაშე, ევროპის ჩემპიონატის MVP 2018, 2022; შვედეთის საუკეთესო ხელბურთელი 2018, 2022;
ანდრეას პალიკა (მეკარე)
კლუბი – Paris Saint-Germain
2021 წლის მსოფლიო ჩემპიონატის საუკეთესო მეკარე, შვედეთის საუკეთესო ხელბურთელი – 2020
ნიდერლანდები ევროპის ჩემპიონატზე აქამდე ორჯერ მოხვდა – 2020 და 2022 წლებში. გუნდი ნელ-ნელა უახლოვდება ევროპულ გრანდებს, რასაც ის ფაქტიც ადასტურებს, რომ ბოლო ევროპის ჩემპიონატზე ნიდერლანდებმა 3 თამაში მოიგო, ხოლო 1 ფრედ დაასრულა და 10-ე ადგილი დაიკავა.
გუნდის წამყვანი მოთამაშეები:
ლუკ სტეინსი (გამთამაშებელი)
კლუბი – Paris Saint-Germain
2022 წლის ევროპის ჩემპიონატის საუკეთესო გამთამაშებელი
კაი სმიტსი (მარჯვენა ინსაიდი)
კლუბი – SC Magdeburg
2024 წლის ევროპის ჩემპიონატის საკვალიფიკაციო ეტაპის მესამე ადგილი ბომბარდირთა დავაში
ბოსნია ჰერცეგოვინა პირველად ევროპის ჩემპიონატზე 2020 წელს მოხვდა, ხოლო მას შემდგომ მესამედ მიიღებს ასპარეზობას 2024 წლის ევროპის ჩემპიონატზე. 23-ე ადგილი ამ ნაკრებისთვის საუკეთესო იყო. მათ 2015 წელს მსოფლიო ვემპიონატზეც იასპარეზეს, სადაც 20-ე ადგილი დაიკავეს.
გუნდის წამყვანი მოთამაშეები:
მარკო პანიჩი (მარჯვენა ინსაიდი)
კლუბი – Montpellier HB
ბენჟამინ ბურიჩი (მეკარე)
კლუბი – SG Flensburg-Handewitt
საქართველოს ეროვნული ნაკრები ევროპის ჩემპიონატზე პირველად ასპარეზობს. ჩვენმა ნაკრებმა ბოლო წლებში ორჯერ (2019, 2021) მოიგო ერთა თასი.
გუნდის წამყვანი მოთამაშეები:
გიორგი ცხოვრებაძე (მარჯვენა ინსაიდი)
კლუბი – Montpellier HB
2024 წლის ევროპის ჩემპიონატის საკვალიფიკაციო ეტაპის ბომბარდირი
ზურაბ ცინცაძე (მეკარე)
კლუბი – GRK Ohrid
საქართველოს ნაკრებიდან 2024 წლის ევროპის ჩემპიონატის საკვალიფიკაციო ეტაპზე ყველაზე მეტჯერ გახდა მატჩის საუკეთესო მოთამაშე
შეგახსენებთ, რომ თამაშები მანჰეიმში Sap Arena-ზე გაიმართება.
11 იანვარი ნიდერლანდები – საქართველო
13 იანვარი საქართველო – შვედეთი
15 იანვარი ბოსნია ჰერცეგოვინა – საქართველო
ტურნირს 10-28 იანვარს გერმანია უმასპინძლებს და მასში 24 ქვეყანა მიიღებს მონაწილეობას.
Marco Wolf / Kenny Beele
ნაკრების სპონსორია Leaderbet
ნაკრების პარტნიორია კომპავა • Kompava