ეროვნული ნაკრები მაკედონიას ეთამაშება

ხელბურთის ეროვნული ნაკრები 25 და 26 ოქტომბერს ორ ამხანაგურ მატჩს გამართავს მაკედონიაში, ამ ქვეყნის ეროვნულ გუნდთან. საქართველოს ნაკრები ემზადება მსოფლიოს 2021 წლის ჩემპიონატისა და ევრო 2022 საკვალიფიკაციო მატჩებისთვის, რომლებიც 2020 წლის იანვარში გაიმართება. 

მსოფლიო ჩემპიონატის პირველი შესარჩევი რაუნდი 10-12 იანვარს გვაქვა იტალიაში – იტალიის, რუმინეთისა და კოსოვოს წინააღმდეგ, ჯგუფის გამარჯვებული კი უშუალოდ მსოფლიო ჩემპიონატზე გამსვლელ პლეიოფში ითამაშებს.

კიდევ უფრო მნიშვნელოვანია ევროპის 2022 წლის ჩემპიონატის მეორე რაუნდის, პლეიოფის მატჩები ფინეთთან. წყვილის გამარჯვებული გავა მთავარ შესარჩევ რაუნდში, რომელშიც ითამაშებს ევროპის უძიერესი 32 გუნდი და გათამაშდება ფინალური ეტაპის 20 საგზური. შეჯიბრება 2020 წლის ოქტომბერში დაიწყება, ხოლო ფინეთთან ორი მატჩის საბოლოო თარიღი დადგენილი არაა – მოცემულია მხოლოდ სათამაშო პერიოდი 2020 წლის 16-დან 23 იანვრამდე და ცნობილია, რომ პირველი შეხვედრა საქართველოში უნდა გაიმართოს.

საქართველოს ნაკრების მთავარი მწვრთნელი იქნება 41 წლის სერბი ნიკოლა მაქსიმოვიჩი, რომლის ხელმძღვანელობითაც გუნდმა 2019 წლის ივლისში, თბილისის სპორტის სასახლეში მოიგო IHF ერთა ჩემპიონატი და ფინეთთან პლეიოფის თამაშის უფლებაც მოიპოვა. მაქსიმოვიჩის ასისტენტი კვლავ იქნება ბექა ორჯონიკიძე, ნაკრების სტაფს კი დაემატა სამი სპეციალისტი: ფიზმომზადების მწვრთნელი, სერბი მარკო შეშუმი, მეკარეების მწვრთნელი, ბერძენი ვასილის ანასტასელოსი და სერბი ფიზიოთერაპევტი დრაგან ილიჩი.

საქართველოს ყველა ნაკრები გუნდის სპორტული დირექტორი ქნება 57 წლის სერბი დრაგან ჯუკიჩი, რომელიც კონსულტანტის რანგში უკვე მუშაობდა ეროვნულ გუნდთან IHF ერთა ჩემპიონატზე. წინა სეზონში ჯუკიჩი წვრთნიდა ქალთა ჩემპიონთა ლიგის 2017 წლის გამარჯვებულ კლუბს, CSM ბუკურეშტის, სანაკრებო დონეზე კი გაუწვრთნია შვეიცარიის, ბრიტანეთის, ისრაელისა და მონტენეგროს ეროვნული გუნდები.

საქართველოს ნაკრები მაკედონიაში 21 ოქტომბერს გაემგზავრება, სრული შემადგენლობით იქვე შეიკრიბება და თამაშამდე სამი დღე ივარჯიშებს. ნაკრების ძირითადი ბირთვი უცხოეთში თამაშობს, საბოლოო შემადგენლობას კი მწვრთნელები დაასახელებენ მას შემდეგ, რაც 15-17 ოქტომბერს თბილისში გაიმართება საქართველოს თასის გათამაშება.

რაც შეეხება მეტოქეს, მაკედონიის ნაკრებს: გუნდი ემზადება 2020 წლის ევროპის ჩემპიონატის ფინალური ეტაპისთვის, რომელიც 2020 წლის იანვარში იმართება. მაკედონიის გუნდი, 2012 წლიდან მოყოლებული,  ზედიზედ ოთხ-ოთხჯერაა გასული ევროპისა და მსოფლიო ჩემპიონატების ფინალურ ეტაპებზე.

21-27 ოქტომბერს ევროპაში სპეციალური სანაკრებო კვირაა. საქართველოს გარდა, მაკედონია 21-22 ოქტომბერს ორჯერ ეთამაშება თურქეთის ნაკრებს. მწვრთნელმა, დანილო ბრესტოვაცმა უკვე გამოაცხადა 23-კაციანი შემადგენლობა ამ ოთხი ამხანაგურ მატჩისთვის.

მაკედონიური მედიის ცნობით, თურქეთთან თამაშებში გუნდს დააკლდება გერმანიის ბუნდესლიგაში მოთამაშე რამდენიმე ხელბურთელი, რადგანაც გერმანიაში 20 ოქტომბერს ეროვნული ჩემპიონატის ტურია, ხოლო საქართველოსთან გუნდს უძლიერესი შემადენლობა ეყოლება – მათ შორის საფრანგეთის ნანტის 39 წლის სუპერვარსკვლავი, კირილ ლაზაროვი.

ხელბურთი. მსოფლიო ჩემპიონატი 2021. ევროპის პირველი საკვალიფიკაციო რაუნდი

ოქტომბერი 2019-იანვარი 2020. გამარჯვებულები გავლენ პლეიოფში

1 ჯგუფი. ლიტვა, სლოვაკეთი, ფარერის კუნძულები, ლუქსემბურგი – 10-12 იანვარი ლუქსემბურგში

2 ჯგუფი. ისრაელი, საბერძნეთი, ფინეთი, კვიპროსი – მიმოსვლით, ორ წრედ (ოქტომბერი-იანვარი)

3 ჯგუფი. იტალია, რუმინეთი, კოსოვო, საქართველო – 10-12 იანვარი, იტალიაში

10 იან. რუმინეთი-საქართველო, 11 იან. საქართველო-იტალი, 12 იან. კოსოვო – საქართველო

4 ჯგუფი. თურქეთი, ბელგია, ესტონეთი – 25-27 ოქტომბერს, თურქეთში

ევროპის ჩემპიონატი 2022. კვალიფიკაციის მეორე ეტაპი, პლეიოფი

იანვარი 2020. გამარჯვებულები გავლენ მთავარ შესარჩევ რაუნდში

საქართველო-ფინეთი – ორი მატჩი, მიმოსვლით, 2020 წლის 16-23 იანვარს

ლუქსემბურგი – ესტონეთი, კვიპროსი – ბელგია