10/10/14 თბილისი 2015: ტურნირის მონაწილეები გაირკვა
გაირკვა ევროპის ახალგაზრდობის ოლიმპიური ფესტივალის სახელბურთო ტურნირის მონაწილე გუნდების ვინაობა.
ჭაბუკთა ტურნირზე იასპარეზებენ: საფრანგეთი, უნგრეთი, ესპანეთი, დანია, სლოვენია, ნორვეგია, შვედეთი და საქართველო, როგორც ორგანიზატორი ქვეყანა (სათადარიგო ქვეყნები არიან: შვეიცარია, გერმანია, პოლონეთი, ისლანდია და ხორვატია).
გოგონების ტურნირზე ითამაშებენ: რუსეთი, დანია, ნორვეგია, ჩეხეთი, რუმინეთი, გერმანია, მონტენეგრო და საქართველო, როგორც ტურნირის მასპინძელი (სათადარიგო: მონაწილეები არიან: შვედეთი, უნგრეთი, ჰოლანდია, ხორვატია და პორტუგალია).
ამ ქვეყნების ფედერაციებმა 31 ოქტომბრამდე უნდა დაადასტურონ ტურნირში მონაწილეობა. შეჯიბრება 1998-99 წლებში დაბადებულთა შორის იმართება. შეიქმნება 2-2 ჯგუფი, ხოლო 2-2 საუკეთესო გუნდი საჩემპიონო პლეიოფს ითამაშებს. შეჯიბრება გაიმართება 2015 წლის 26-31 ივლისს, ახალ სპორტის სასახლეში უნივერსიტეტის მაღლივ კორპუსთან, რომლის მშენებლობა ამჟამად მიმდინარეობს. ტურნირის წილისყრა გაიმართება 2015 წლის აპრილში, თბილისში.
შერჩევის კრიტერიუმები ასეთი იყო: გოგონებში 7 მონაწილე გამოვლინდა ორი ტურნირის, 2014 წლის ცხრამეტწლამდელთა მსოფლიო ჩემპიონატისა და თვრამეტწლამდელთა ევროპის ღია პირველობის შედეგებით, ხოლო ჭაბუკებში – 2014 წლის თვრამეტწლამდელთა ევროპის ჩემპიონატის მიხედვით, ოღონდ, სლოვენიელ და ნორვეგიელ ჭაბუკებს თბილისის ფესტივალზე თამაშის უფლება ადრევე ჰქონდათ მოპოვებული – ისინი 2013 წლის ფესტივალის ჩემპიონი და ფინალისტი არიან.
