ქართული ხელბურთის მომავალი ესპანეთში საერთაშორისო გამოცდილებას მიიღებს

საქართველოს ხელბურთის ეროვნული ფედერაციის ორგანიზებითა და ესპანეთის ხელბურთის ფედერაციასთან მჭიდრო თანამშრომლობის ფარგლებში, ვაჟთა და გოგონათა ახალგაზრდული ნაკრებები მიმდინარე წლის 6-18 აპრილს გაემგზავრებიან ესპანეთში, სადაც ისინი მონაწილეობას მიიღებენ საერთაშორისო საწვრთნელ შეკრებასა და ტურნირში.

მოსამზადებელი პროგრამა შედგენილია ესპანელ სპეციალისტებთან ერთად და მიზნად ისახავს ახალგაზრდა სპორტსმენების პროფესიულ ზრდას და საერთაშორისო გამოცდილების გაღრმავებას.

7-12 აპრილს გუნდები ჟირონაში ერთობლივ სასწავლო-საწვრთნელ შეკრებას გაივლიან, რომელსაც ესპანელი სპეციალისტები, პაბლო კამპოსი და ხავიერ სალვადორი უხელმძღვანელებენ. ამ პერიოდის განმავლობაში დაგეგმილია სამი ამხანაგური მატჩის გამართვა, რაც გუნდებს საშუალებას მისცემს პრაქტიკულად შეისწავლონ თანამედროვე თამაშის სტრატეგიები.

საწვრთნელი პროცესის ერთ-ერთი მნიშვნელოვანი ნაწილი იქნება ბარსელონას აკადემიაში ვიზიტი, სადაც ქართველი ხელბურთელებს შეახვედრებენ ადგილობრივ მწვრთნელებს, ჩატარდება ერთობლივი ვარჯიში და გაიმართება ამხანაგური მატჩი ბარსელონას აკადემიის გუნდებთან.

13-17 აპრილს, ნაკრებები ლორეტ დელ მარში საერთაშორისო ტურნირში მიიღებენ მონაწილეობას, სადაც ამხანაგურ მატჩებს გამარავენ როგორც ესპანურ, ისე სხვა ქვეყნების გუნდებთან.

ესპანეთში მიემგზავრება 18 ვაჟი და 18 გოგონა, ასევე თანმხლები მწვრთნელები და ოფიციალური პირები.

ხელბურთის ფედერაცია მაქსიმალურად უწყობს ხელს ორგანიზაციული და ლოჯისტიკური საკითხების მოგვარებას, რათა ახალგაზრდა ხელბურთელებმა სრულფასოვნად გამოიყენონ ეს უნიკალური შესაძლებლობა.