ლეგიონერები/დიხამინჯიამ და ცხოვრებაძემ 7-7 ბურთი გაიტანეს, კბილაშვილმა – 9

ქართველმა ლეგიონერებმა ევროპის ეროვნულ ჩემპიონატებში მორიგი ტურის მატჩები ჩაატარეს, მათ შორის რამდენიმე გამორჩეულ შეხვედრას აქვე გთავაზობთ.

საფრანგეთი

სტარ ლიგის მე-10 წრეში ითამაშეს ქართველმა ლეგიონერებმა, ნიკოლოზ კალანდაძემ და ერეკლე არსენაშვილმა.

კალანდაძემ და „პროვანს-ექსმა“ საკუთარ კედლებში მიიღეს „ლიმოჟი“, მაგრამ წარმატებას ვერ მიაღწიეს და 30-32 დამარცხდნენ. კალანდაძის ანგარიშზე ერთი გოლი და ხუთი ასისტია.

მწირი გამოდგა არსენაშვილის მონაგარიც. „ტრამბლეს“ ქართველი მოთამაშე თანაგუნდელებს ერთი ბურთით დაეხმარა, მისმა გუნდმა კი 27-27 ითამაშა „დიუნკერკთან“.

„პროვანს-ექსი“ 8 ქულით მე-9 ადგილზეა, „ტრამბლეს“ 12 ქულა აქვს და მე-5 საფეხურზეა.

ხორვატია

გიორგი ცხოვრებაძემ და „ზაგრებმა“ პრემიერ ლიგის მე-10 წრის შეხვედრაში „სპაჩვას“ უმასპინძლეს და 11-ბურთიანი სხვაობით – 38-27 დაამარცხეს. ზაგრებელთა წარმატებაში მნიშვნელოვანი წვლილი მიუძღვის ქართველ ლეგიონერს, რომელიც შვიდი გოლით და ხუთი ასისტით ორივე გუნდიდან საუკეთესო იყო.

„ზაგრები“ ქულათა მაქსიმუმით სატურნირო ცხრილს უდგას სათავეში.

რუმინეთი

ირაკლი კბილაშვილის „პოტაისამ“ ეროვნული ლიგის მე-6 ტურში „ბუქარესტი“ მიიღო და 30-27 მოუგო. ორივე გუნდიდან საუკეთესო იყო ქართველი ლეგიონერი, რომელმაც ბუქარესტელებს 9 ბურთი გაუტანა.

„პოტაისა“ 10 ქულით ცხრილის მეორე საფეხურზეა და ლიდერ „ბუზეუს“ 3 ქულით ჩამორჩება.

ისლანდია

გიორგი დიხამინჯია და “აკიურეირი”„ჰაბნარფორდიურს“ ეწვია და 32-45 დამარცხდა. ისლანდიელთა ქართველმა ლეგიონერმა შვიდი ბურთი გაიტანა.„აკიურეირი“ 12 ქულით მეოთხე ადგილზეა.

პოლონეთი

სუპერლიგის მე-11 წრეში ქართველთა დერბი შედგა. მირიან გავაშელიშვილის „ოსტროვიამ“ ზურაბ ცინცაძის „ლეგიონოვო“ მიიღო და 28-24 მოუგო.

გავაშელიშვილმა ორი ასისტი შეასრულა და ცინცაძეს ერთი ბურთი გაუტანა, საქართველოს ნაკრების და „ლეგიონოვოს“ მეკარემ კი ხუთი სეივი შეასრულა.

ჩრდ. მაკედონია

სუპერ ლიგის მე-12 ტურში „ბუტელე სკოპიე“ და დავით გრიშიკაშვილი „ეუროფარმ პელისტერთან“ გასვლით შეხვედრაში ათ ბურთიანი სხვაობით – 31-21 დამარცხდა. ქართველის ანგარიშზე ერთი გატანილი ბურთია.

„ბუტელე სკოპიე“ 11 ქულით მე-6 ადგილზეა.