გერმანელი ექსპერტის, ჰელმუტ მარტინის თეორიულ და პრაქტიკულ სემინარებს თბილისმაც უმასპინძლა
სასკოლო ხელბურთის განვითარების პროგრამაში თბილისიც ჩაერთო. თეორიულ და პრაქტიკულ სემინარებს დედაქალაქის სკოლების ფიზიკური აღზრდის 32 პედაგოგი დაესწრო.
სწავლების პროცესი, რომელიც ოთხი დღის განმავლობაში ხელბურთის გერმანელი ექსპერტის ჰელმუტ მარტინის და მისი თანაშემწის, გოგა ჯმუხაძის დახმარებით მიმდინარეობდა, განსაკუთრებული ყურადღება დაეთმო სხვადასხვა ასაკობრივი კატეგორიისთვის შესაბამისი ვარჯიშების შერჩევას, მათში სხვა აუცილებელი უნარების, კოორდინაციის განვითარებას.
ჰელმუტ მარტინის შემსწავლელი კურსის დასრულების და შესაბამისი ცოდნის მიღების ნიშნად, ფიზიკური აღზრდის პედაგოგებს ხელბურთის საერთაშორისო ფედერაციის (IHF) სასკოლო კურსის გავლის დამადასტურებელი სერტიფიკატები გადაეცათ.
პროექტი ხორციელდება ხელბურთის განვითარების, „იცხოვრე ხელბურთით“ პროგრამის ფარგლებში, რომელიც ითვალისწინებს მომდევნო ოთხი წლის განმავლობაში მასწავლებელთა კვალიფიკაციის ამაღლებას, გადამზადებას, ფესტივალებისა და მასტერკლასების ორგანიზებას.
პროექტი ასევე ითვალისწინებს სპორტის ხელმისაწვდომობის, მოზარდთა ფიზიკური აქტივობის გაზრდას, საქართველოს სკოლებში ხელბურთის განვითარების, ახალი სტანდარტების დამკვიდრებას და სპორტის გაკვეთილების გამრავალფეროვნებას.
პროექტი, რომლის თაოსანიც საქართველოს ხელბურთის ფედერაციაა, მიმდინარეობს საქართველოს სპორტის სამინისტროს და ხელბურთის საერთაშორისო ფედერაციის მხარდაჭერით და განათლების სამინისტროს ჩართულობით.
აღსანიშნავია, რომ პროგრამის ფარგლებში D კატეგორიის საერთაშორისო ლიცენზია უკვე მიიღო ასამდე ფიზიკური აღზრდის პედაგოგმა და მწვრთნელმა, რაც უდავოდ მნიშვნელოვანი წინგადადგმული ნაბიჯია ხელბურთის სწავლების ხარისხის გაუმჯობესებისა და სკოლებში სპორტის განვითარების მიმართულებით.
18-21 ოქტომბრის ჩათვლით თეორიულ და პრაქტიკულ სემინარებს გორი უმასპინძლებს.
