თელავში პირველად ტარდება ევროპის 19-წლამდე გოგონათა ჩემპიონატი ხელბურთში

თელავი, საქართველო – 12 ივლისი, 2025 წ.

12 ივლისს, ხელბურთში 19-წლამდე გოგონათა შორის ევროპის ჩემპიონატი (Women’s 19 EHF Championship) დაიწყება, რომელსაც პირველად უმასპინძლებს თელავი, რაც მნიშვნელოვანი ეტაპია როგორც ადგილობრივი სპორტული ინფრასტრუქტურის განვითარებისათვის, ასევე საქართველოს ხელბურთის საერთაშორისო აღიარებისთვის. 

ტურნირში მონაწილეობას 10 ქვეყნის ეროვნული ნაკრები მიიღებს. თამაშები თელავის სპორტის სასახლეში გაიმართება, დღეში ხუთი მატჩი ჩატარდება, რომლებიც 10:30, 12:30, 14:30, 16:30 და 18:30 საათზე დაიწყება. 

ევროპის ჩემპიონატის საზეიმო გახსნის ცერემონია 12 ივლისს, 16:00 საათზე ჩატარდება, საქართველოს გოგონათა ნაკრების პირველი მატჩის დაწყებამდე.

ღონისძიებას დაესწრებიან თელავის მუნიციპალიტეტის წარმომადგენლები. წარმოდგენილი იქნება მდიდარი კულტურული პროგრამა.

ცერემონიაში მოინაწილეობას მიიღებენ თელავის კულტურის ცეკვისა და სიმღერის ანსამბლი „მართვე“, ფოლკლორული ანსამბლი „შემოძახილი“ და ვოკალური ჯგუფი „ჩაკრულო“. 

ტურნირისთვის მოსამზადებელ ეტაპზე საქართველოს ნაკრებმა შეკრება აზერბაიჯანში გაიარა და სამი ამხანაგური მატჩი გამართა – 43:16 დაამარცხა „ბაქო“, ხოლო „იდმან აკადემიასთან“ ერთი მატჩი მინიმალური ანგარიშით 29:30 დათმო, მეორე კი 39:36 მოიგო.

საქართველოს ნაკრების მატჩების განრიგი:

12 ივლისი, 16:30 | იტალია – საქართველო

13 ივლისი, 16:30 | ბელგია – საქართველო

15 ივლისი, 16:30 | საქართველო – დიდი ბრიტანეთი

16 ივლისი, 16:30 | საქართველო – კოსოვო

საქართველოს ნაკრების შემადგენლობა: ანა დოლბაძე, ანანო გაწერელია, ნატალი საბაშვილი, დიანა არაბიძე, მართა ბარნაბაშვილი, თეკლა ძამუნაშვილი, ანასტასია ესართია, ნატალი გაზაშვილი, ლიზი ჯანდიერი, ლიზი ქაჯაია, მარიამ ქათამაძე, ნინო ქებურია, ანა კოვზირიძე, ლიზი კვესელავა, მარიამ ლაფერაძე, ანასტასია მაჭანკალაძე, მარიამ ოდიკაძე, გვანცა რურუა. 

სამწვრთნელო შტაბი:

მთავარი მწვრთნელი: გიორგი გვაზავა

მწვრთნელები: მარიამ ჩავჩიძე, ინა ჭკუასელი

მენეჯერი: ლანა მარგიანი 

ევროპის ჩემპიონატის თელავში ჩატარება კიდევ ერთხელ უსვამს ხაზს საქართველოს მზარდ როლს საერთაშორისო სპორტულ არენაზე და ხელს უწყობს ხელბურთის პოპულარიზაციასა და ახალგაზრდების სპორტულ ჩართულობას რეგიონში.