შეცდომა
  • თარგი ამ ჩვენებისთვის არ არის ხელმისაწვდომი. გთხოვთ დაუკავშირდით საიტის ადმინისტრატორს.

მთავარი

20/12/14 ჭაბუკთა ნაკრებმა ბელარუსში ორჯერ მოიგო

ბელარუსში ტურნეზე მყოფმა საქართველოს ჭაბუკ ხელბურთელთა ნაკრებმა უკვე ორი მატჩის გამართვა მოასწრო და ორივე მოიგო.

პარასკევს ჩვენი ოლიმპიური გუნდის მეტოქე იყო ბელარუსის ამავე ასაკის (1998) ნაკრები და ქართველებმა 30-28 მოიგეს, ხოლო  შაბათს დაამარცხეს ოლიმპიური რეზერვის რესპუბლიკური ცენტრის თანატოლები - 38-33. ორივე თამაში მინსკში გაიმართა.

ნაკრების მწვრთნელმა გიორგი ქობელაშვილმა ტელეფონით გვაცნობა, რომ ტურნე ნაყოფიერად მიმდინარეობს. ნაკრები დღეში თითოჯერ ვარჯიშობს და თამაშობს. კვირას და ორშაბათს კიდევ ორი მატჩია დაგეგმილი, 23 დეკემბერს კი გუნდი საქართველოში დაბრუნდება და საშობაო არდადეგებზე წავა.

მინსკი, 19 დეკემბერი

ბელარუსი (16წ) - საქართველო (16წ) 28-30

საქართველო: ხანდოლიშვილი, ხარაიშვილი - კბილაშვილი 9, არსენაშვილი 5,  ფერაძე 4, ბულბულაშვილი 4, რუსტამოვი 3, იობაშვილი 2, მაისურაძე 1, მერკვილაძე 1, ზარნაძე 1, მიქავა, მამულაშვილი, ზაა;ლიშვილი

20 დეკემბერი

ოლიმპიური რეზერვების ცენტრი - საქართველო 33-38

ფოტო: გიორგი ქობელაშვილი და ნაკრების მთავარი მწვრთნელი გარი თურქია

19/12/14 ბიჭების მოგება და გოგონების ფრე

საქართველოს ოლიმპიურმა ნაკრებმა გუნდებმა ამხანაგური მატჩები გამართეს. ჭაბუკთა გუნდმა მინსკში ორბურთიანი სხვაობით დაამარცხა ბელარუსის ნაკრები, ხოლო გოგონებმა გლდანში ფრედ ითამაშეს აზერბაიჯანთან.

ჭაბუკთა ნაკრების მატჩის დეტალებს შაბათს მოგაწვდით, ხოლო გოგონათა ნაკრების მეტოქე იყო აზერბაიჯანის გუნდი, რომელიც ძირითადად 1996-97 წლებში დაბადებულებითაა დაკომპლექტებული, განსხვავებით ჩვენი გუნდისგან, რომელიც ევროპის ახალგაზრდობის ოლიმპიური ფესტივალისთვის ემზადება, ამ ტურნირის მონაწილეთა ასაკობრივი ზღვარი კი 1998 წლის 1 იანვარია.

აზერბაიჯანის ამ გუნდმა მაისში, ჯემალ ცერცვაძის თასზე 23-12 დაგვამარცხა. ამჯერად სტუმრებს არ ჰყავდათ ლიდერი, ფოლადოვა, თუმცა, საქართველოს ნაკრების მწვრთნელმა როლანდ ერაძემ სხვადასხვა მიზეზის გამო ვერ ათამაშა 6 ხელბურთელი  (ყველაშვილი, ვენეცკი, ხურცილავა, ჯავახია, მიხელიძე, ნარიმანიძე).

აზერბაიჯანი თავიდან 6-2 დაწინაურდა, მაგრამ ტაიმი ქართველებმა 10-7 მოიგეს და მეორეში, გადელიას გოლებისა და მეკარე ყაველაშვილის კარგი თამაშის შემდეგ 16-11 იგებდნენ. მატჩის მიწურულს ერაძემ შემადგენლობის ცვლა დაიწყო, გადელია კი მაშინ დააბრუნა მოედანზე როდესაც ანგარიში უკვე თანაბარი იყო და დასრულებამდე ერთი წუთი იყო დარჩენილი. ბოლო შეტევაში აზერბაიჯანელები თეთრაშვილის წინააღმდეგ დაჯარიმდნენ, მაგრამ გადელიას შვიდმეტრიანი მეკარე მუსაევამ მოიგერია - 18-18.

როლანდ ერაძე, საქართველოს ნაკრების მწვრთნელი: - დაცვაში თამაშით კმაყოფილი ვარ. პირველ ტაიმში არაგვიშავდა სწრაფ შეტევაში ბურთის მეტოქის ნახევარზე გადატანის დროს. მეორე ნახევარში შემადგენლობის ვარირება დავიწყე. ორი თვეა,  გუნდთან ვმუშაობ და პირველი თამაში გვქონდა, ასე რომ  მნიშვნელოვანი იყო ყველას გასინჯვა. შედეგისთვის ყურადღება არ მიმიქცევია.

ქართველი და აზერბაიჯანელი გოგონები მეორე მატჩს შაბათს გამართავენ. შეხვედრა გლდანში 13 საათზე დაიწყება. გოგონათა ნაკრებს, ახალგაზრდული ოლიმპიადის გარდა (თბილისი,  2015 წლის ივლისი), ევროპის ჩვიდმეტწლამდელთა ჩემპიონატის კვალიფიკაცია ელის. ეს ტურნირიც საქართველოში გაიმარტება 2015 წლის 20-22 მარტს.

საქართველო (16წ)  - აზერბაიჯანი (18წ) 18-18

19 დეკემბერი, გლდანი

საქ: ყაველაშვილი - გადელია 6, მორჩაძე 2, ღვალაძე 2, თეთრაშვილი 2, გაბისონია 2, ქიტესაშვილი 1, ჩოხელი 1, ბერიძე 1, კუნელაშვილი 1, ჩოგოვაძე, გიორგაძე

აზ: მ. მუსაევა, სალამოვა - კალმიკოვა 6, სმაგინა 4,  გ. გულიევა 2, მამადოვა 2, რასულოვა 2, ალიევა 1, ბაგიროვა 1,  გაჰრამანოვა, ს. მუსაევა, ნაგიევა, ბაირამოვა, ნ. გულიევა

მსაჯები: გ. სურმავა, ზ. სიმონია

20/12/14 ზედიზედ მეორე ფრე აზერბაიჯანთან

საქართველოს ოლიმპიურმა ნაკრებმა ზედიზედ მეორე მატჩი ითამაშა ფრედ თბილისში სტუმრად მყოფ აზერბაიჯანის გოგონათა ნაკრებთან - 27:27. მესამე თამაში კვირას, 20 საათზე გაიმართება გლდანის ხელბურთის აკადემიაში.

მეორე შეხვედრის სიუჟეტი ბევრად უფრო დაძაბული იყო. სტუმართა გუნდი, რომელიც ქართველებზე 1-2 წლით უფროსებითაა დაკომპლექტებული,  ლიდერობდა უმეტესი დროის განმავლობაში და ტაიმიც მოიგო - 16-14.

მეორე ტაიმში მოედანზე გამოსულმა მეკარე ჩაჩუამ რამდენიმე ბურთი მოიგერია და სწრაფი შეტევებიც წამოიწყო. ერთერთი ასეთი შეტევის შემდეგ ღვალაძემ, რომელმაც სხვადასხვა ხერხით (ორივე კუთხიდან, სწრაფ შეტევაში, შვიდმეტრიანიდან) ჯამში 7 გოლი გაიტანა, ანგარიში გაათანაბრა - 18-18, მალე კი გადელიამ (9 გოლი, ცხრიდან 7 გატანილი  შვიდმეტრიანი) ორი ბურთითაც დააწინაურა მასპინძლები, 20-18, თუმცა, ტრავმის გამო დროებით დატოვა მოედანი. ამ მონაკვეთში აზერბაიჯანმა ხუთბურთიანი გაქცევა მოაწყო. კრიტიკული მომენტი დადგა მაშინ, როდესაც ორი წუთით ბერიძე გააძევეს, დასრულებამდე 7  წუთით ადრე კი სტუმრები 3 ბურთით წინ იყვნენ - 25-22.

როდესაც ბოლო წუთი დაიწყო, ანგარიში 27-25 იყო, მაგრამ გაბისონიამ ერთი ბურთი გაქვითა და დასრულებამდე 36 წამით ადრე აზერბაიჯანი ბოლო შეტევაში წავიდა. 15 წამით ადრე, პასიური შეტევის გამო სტუმრებს ბურთი ჩამოერთვათ, გარღვევაში ქრისტინე ღვალაძე გაიქცა, რთული ბურთი დაიჭირა, მეტოქეს გაასწრო და სირენამდე 2 წამით ადრე შვიდმეტრიანიც მიპოვა.

ისევე როგორც პირველ მატჩში (18-18), დროის ამოწურვის შემდეგ შვიდმეტრიანის ხაზზე თათია გადელია დადგა და ამჯერად ზუსტად დაარტყა - 27-27, ზედიზედ მეორე ფრე.

როლანდ ერაძე, საქართველოს ნაკრების მწვრთნელი: - დაცვაში უარესად ვითამაშეთ. რამდენიმე ხელბურთელი ტრავმის გამო გვაკლია, ამიტომაც ზოგიერთს შეუცვლელად უწევს მატჩი და იღლება. მაგალითად, ნინო გაბისონია დაცვაში ცენტრალური მოთამაშეა და მისი დასვენების საშუალება არ მქონდა.  დაცვაში გამოვყოფ მედეა ჩოხელსაც. შეტევაში გუშინდელთან შედარებით უფრო დალაგებულად ვითამაშეთ.

საქართველო (16წ)  - აზერბაიჯანი (18წ) 27-27

20 დეკემბერი, გლდანი

საქ: ყაველაშვილი, ჩაჩუა - გადელია 9, ღვალაძე 7, გაბისონია 5, ქიტესაშვილი 2, ჩოგოვაძე 2, ბერიძე 2, ჩოხელი, მორჩაძე, კუნელაშვილი, თეთრაშვილი

აზ: მ. მუსაევა -გ. გულიევა 7, კალმიკოვა 5, სმაგინა 3,  მამადოვა 3, ალიევა 2, ნაგიევა 2, ბაგიროვა 2, რასულოვა 1, გაჰრამანოვა 1, ს. მუსაევა 1

მსაჯები: გ. გვაზავა, ზ. სიმონია

19/12/14 შვედი ექსპერტების ვიზიტი საქართველოში

ცერცვაძის სახელბურთო აკადემიაში გაიმართა შეხვედრა საქართველოს ხელბურთის ფედერაციის ხელმძღვანელობასა და შვედ ექსპერტებს, პერ კარლენსა და ოვე ერიქსონს შორის.

ვიზიტის ორგანიზატორები არიან საგარეო საქმეთა სამინისტრო, საქართველოს ელჩი შვედეთში კონსტანტინე ქავთარაძე და სპორტისა და ახალგაზრდობის სამინისტრო. ერთერთი ექსპერტი, პერ კარლენი გახლავთ წარსულში ძალიან ცნობილი ხელბურთელი - მსოფლიოსა (1990) და ევროპის ჩემპიონი (1994), ოთხჯერ გამოსულა ზაფხულის ოლიმპიადაზე და ორჯერ უთამაშია ფინალში (1992, 96). მოთამაშის კარიერის დასრულების შემდეგ ის გახლდათ მწვრთნელი, ლექტორი და ხელბურთის საერთაშორისო ექსპერტი.  მის პარტნიორს, ოვე ერიქსონს მჭიდრო კავშირები აქვს საქართველოსთან ბიზნესისა და ტურისტული და კუთხით, წარმოადგენს კომპანიას Caucasiantours.

თანამშრომლობა დაიწყო ოქტომბერში, როდესაც სტოკჰოლმში გაიმართა საერთშორისო ტურისტული გამოფენა. მასში მონაწილეობდა საქართველოს საელჩოც, ხოლო ელჩმა ქავთარაძემ კარლენსა და ერიქსონს თანამშრომლობა შესთავაზა სპორტისა და ტურიზმის სფეროში. პერ კარლენმა გამოთქვა მოსაზრება საქართველოში საბავშვო ხელბურთის განვითარების პროექტის განხორციელების შესახებ. ამგვარი პროექტი მას შვედეთის რამდენიმე სკოლაში აქვს გამოცილი. პროექტი ითვალისწინებს სასკოლო ასაკის ბავშვებისთვის ხელბურთში რეგულარული ასპარეზობების გამართვას, ვაჟებისა და გოგონების შერეული გუნდების ჩამოყალიბებას, სკოლებში მინი-ხელბურთის სათამაშო ინფრასტრუქტურის განვითარებას. პროექტის მიზანი მოსწავლეების ფიზიკური გაჯანსაღება, გენდერული თანასწორობის პრინციპების ბავშვობიდანვე გაცნობა, ზოგადად, ხელბურთის პოპულარიზაცია და ნიჭიერი ბავშვების გამოვლენაა.

ხელბურთის ფედერაციის მხრიდან შეხვედრას ესწრებოდნენ პრეზიდენტი ზურაბ კაკაბაძე, გენერალური მდივანი ქეთევან კობერიძე და ვიცეპრეზიდენტები, ვახტანგ მეიფარიანი და ელიზბარ არსენაშვილი.

იქამდე შვედ ექსპერტებს შეხვედრა ჰქონდათ სპორტის სამინისტროში, მინისტრ ლევან ყიფიანთან, მის მოადგილე თამაზ თევზაძესთან და სპორტის დეპარტამენტის უფროს ირაკლი დოლაბერიძესთან . შეხვედრას ესწრებოდნენ ბავშვთა და მოსწავლე ახალგაზრდობის ფედერაციის პრეზიდენტი ლევან კიკალიშვილი და მხიარული სტარტების ფედერაციის პრეზიდენტი დავით ილურიძე.

19 დეკემბერს სტუმრები მიწვეულნი არიან ჯანდაცვისა და განათლების სამინისტროებში, თბილისის მერიაში, ეროვნულ ოლიმპიურ და პარალიმპიურ კომიტეტებსა და სპორტის აკადემიაში.

20/12/14 ფინალში ნორვეგია და ესპანეთი ითამაშებენ

ევროპის ჩემპიონატის ნახევარფინალში ესპანეთმა 19-18 დაამარცხა 2012 წლის ჩემპიონი მონტენეგრო, ხოლო ნორვეგიამ 29-25 მოუგო შვედეთს.

ნორვეგია ზედიზედ მეშვიდედ გავიდა ფინალში, საერთოდ, კი წინა 10 ტურნირზე მათ ანგარიშზე 5 ჩემპიონობა, 3 წაგებული ფინალი და 1 ბრინჯაოს მედალია. ესპანეთი ერთადერთხელ ყოფილა ვერცხლის პრიზიორი, 2008 წელს, როდესაც ფინალი ნორვეგიასთან წააგო. ნორვეგიამ მოიგო ამ გუნდების მატჩიც მიმდინარე ჩემპიონატის მეორე ეტაპზე - 29-26.

ოლიმმპიური ჩემპიონი მთელი თამაში უგებდა შვედეთს, სადაც მხოლოდ იზაბელ გულდენი გამოირჩეოდა. მისი მეცადინეობით გუნდმა რამდენჯერმე შეამცირა სხვაობა 1 გოლამდე, მაგრამ მომავალი გამარჯვებულის ვინაობა საეჭვო არცერთ მომენტში არ გამხდარა. გადამწყვეტი გამოდგა მე-40-45-ე წუთების მონაკვეთი, როდესაც 18-17-დან ნორვეგიამ სხვაობა 5 გოლამდე აიყვანა - 22-17. საუკეთესო იყო ნორა მორკი - 5 გოლი და 10 საგოლე პასი.

დრამატიზმით და შეცდომებით იყო სავსე ესპანეთ-მონტენეგროს მატჩი. მონტენეგრომ შეტევების მხოლოდ 32% დაასრულა გოლით, შეტევის დროს კი  16 ბურთი დაკარგა. დაახლოებით ასეთივე იყო ესპანეთის მაჩვენებელი (35%, 18 ტერნოვერი) და გადამწყვეტი გამოდგა მეკარე სილვია ნავაროს კარგი თამაში.

25 წუთის შემდეგ ესპანეთი 12-5 იგებდა. მონტენეგროელები დაცვაში ვერ უმკლავდებოდნენ პივოტ ელისაბეტ ჩავესს (192 სმ), ხოლო შეტევაში თამაში არ წაუვიდათ ლიდერებს - მილენა კნეზევიჩს (7 დარტყმა, არცერთი გოლი) და კატარინა ბულატოვიჩს (10/4). ტაიმი მორჩა 13-8, ხოლო მონტენეგრო მხოლოდ მაშინ ჩაერთო თამაშში, როცა რამდენიმე ბურთი მოიგერია სათადარიგო მეკარე რაიჩიჩმა, ხოლო ესპანეთმა 14 წუთის განმავლობაში გოლი ვერ გაიტანა - 14-17, 53-ე წუთზე. დასრულებამდე ზუსტად ორი წუთით ადრე იოვანკა რადიჩევიმა სხვაობა მინიმუმამდე დაიყვანა 17-18, მაგრამ იქვე ელიზაბეტ პინედომ შეაგდო, ხოლო რადიჩევიჩის ბოლო გოლის შემდეგ (18-19) ესპანეთს შეტევისთვის 20 წამი დარჩა და ბურთიც შეინარჩუნა.

ევროპის ჩემპიონატი 2014. ქალები. 7-21 დეკემბერი, უნგრეთი-ხორვატია

19 დეკემბერი, ბუდაპეშტი

მატჩი მეხუთე ადგილისთვის

უნგრეთი -საფრანგეთი 25-26

ნახევარფინალი

მონტენეგრო - ესპანეთი 18-19

მნტ: ბარიაკტაროვიჩი (4/19), რაიჩიჩი (7/11) - რადიჩევიჩი 6, კ. ბულატოვიჩი 4,  იოვანოვიჩი 2 (5 პასი), პავიჩევიჩი 2, პეტროვიჩი 2, ა. ბულატოვიჩი 1, მეჰმედოვიჩი 1, კნეზევიჩი, კლიკოვაცი, მალოვიჩი, რამუშოვიჩი,  დესპოტოვიჩი

ესპ: ნავარო (18/36) - პინედო 5, მანგე 4, ჩავესი 3, პენია 3 (3 პასი), კაბრალი 2, ფერნანდესი 1, აგილარი 1, მარტინი, ელორსა, გონსალესი, ლოპესი, ეგოსკე

ნორვეგია - შვედეთი 29-25

ნორ: ს. სოლბერგი (14/36), სანდო (0/3) - ლოკე 6, მორკი 5 (10 პასი), რიგელჰუტ-კორენი 4, კრისტიანსენი 3, ოფტედალი 3, ჰერემი 3, ალსტადი 2, შ. სოლბერგი 2,  ბ. რიგელჰუტი 1, ბრეივანგი, ვიბე

შვდ: იდენი (7/28), ბუნდსენი (1/8) - გულდენი 9, ოდენი 3, ტორსტენსონი 2, ჰაგმანი 2, სანდი 2, ჯ. ალმი 2, ჰელებერგი 1, ფოგელსტრიომი 1, რობერტსი 1,  ი. ალმი 1, იოჰანსონი 1, იაკობსენი, ბლომი, აგრენი

21 დეკემბერი, ბუდაპეშტი

მესამე ადგილისთვის

18:30 შვედეთი - მონტენეგრო

ფინალი

21:00 ნორვეგია - ესპანეთი

ფოტო: ესპანეთი-მონტენეგრო, მეკარე სილვია ნავარო

18/12/14 ოლიმპიური ნაკრები ბელარუსში მიემგზავრება

19 დეკემბრის დილას ბელარუსში მიემგზავრება ბიჭების ოლიმპიური ნაკრები - გუნდი, რომელიც ევროპის ახალგაზდრობის ოლიმპიური ფესტივალისთვის ემზადება. ტურნირი 2015 წლის ივლისში გაიმართება თბილისში.

გამგზავრების წინ ნაკრებმა გარი თურქიასა და გიორგი ქობელაშვილის ხელმძღვანელობით მორიგი შეკრება გამართა გლდანის ცერცვაძის სახელობის აკადემიაში. გუნდში 14 ხელბურთელია ქვეყნის 5 კლუბიდან. დაგეგმილია რამდენიმე საწვრთნელი მატჩი, მათ შორის ბელარუსის ამავე ასაკის ნაკრებთან. ტურნე 23 დეკემბერს დასრულდება.

გამგზავრების წინ ჭაბუკებმა საწვრთნელი მატჩი გამართეს ქვეყნის ჩემპიონ სტუ-ს წინააღმდეგ და 29-36 წააგეს.

ამ დღეებში თამაშები ექნება ამავე ასაკის, 1998 წელს დაბადებულ საქართველოს გოგონათა ნაკრებს (მწვრთნელები როლანდ ერაძე და ელისო ჟურულიშვილი). მათ მეტოქე თბილისში ეწვევა - აზერბაიჯანის გოგონათა ნაკრები, ოღონდ 1996 წელს დაბადებულები. აზერბაიჯანელები 19 დეკემბერს იქნებიან თბილისში და რამდენიმე საწვრთნელ მატჩს გამართავენ გლდანის დარბაზში.

ოლიმპიური ნაკრები ბელარუსში. 19-23 დეკემბერი, 2014

მეკარეები: სანდრო ხანდოლიშვილი (ქარიშხალა), გიორგი ხარაიშვილი (იმედი)

უკანა ხაზი: გიგი ფერაძე, ირაკლი კბილაშვილი, ლუკა ბულბულაშვილი (ქარიშხალა), გიგა ზარნაძე (პეგასი), ზეზვა იობაშვილი (იმედი)

გარემარბები: ხაზეინ რუსტამოვი (იმედი), ლევან მამულაშვილი (ქარიშხალა), გიორგი მერკვილაძე (ქუთაისი), ზაალ ზაალიშვილი (შევარდენი)

პივოტები: ერეკლე არსენაშვილი (ქარიშხალა), ნოდარ მაისურაძე (პეგასი), გიორგი მიქავა (იმედი)

მთავარი მწვრთნელი გარი თურქია, მწვრთნელი გიორგი ქობელაშვილი