25/01/14 ფინალში დანია და საფრანგეთი ითამაშებენ

პირველი ტაიმი ხორვატების იყო. ისინი ლიდერობდნენ თვიდან ბოლომდე, მიუხედავად იმისა, რომ 8 წუთი მოუხდათ უმცირესობაში თამაში. გამთამაშებელმა დომაგოი დუვნიაკმა დანიელი მეკარის, ნიკლას ლანდინის მოერიებული ბურთი მოიხელთა და ზედ ბოლო წამზე თავისიანები 2 ბურთით დააწინაურა – 15:13.

მეორე ტაიმი დანიამ უმცირესობაში დაიწყო და მალევე დაუდგა კრიტიკული მომენტი: მასპინძლებს მეორე მოთამაშეც გაუძევეს, ხოლო ხორვატი ივან ჩუპიჩი შვიდმეტრიანის ნიშნულზე დადგა.

პენალტი ძელს მოხვდა, ხოლო რიცხობრივი უპირატესობის ბოლომდე ლანდინმა ორი დარტყმა მოიგერია და ანგარიში უცვლელი დატოვა – 13:15. ამას, ცხადია, მოჰყვა მასპინძელთა აღმავლობა და 35 წუთზე მადს ქრისტიანსენმა დააწინაუდა თავისი გუნდი – 16:15.

იგორ კოპლიარმა (210 სმ) გაათანაბრა,მაგრამ საქმეში ჩაერთი მარჯვენა გარემარბი ანდრეს ეგერტი – მისი ზედიზედ სამი გოლის შემდეგ მასპინძლები 21:18 იგებდნენ. ხორვატიან დევნა წამოიწყო და გარემარბ ზლატკო ჰორვატის ზედიზედ სამი გარღვევის შემდეგ 47 წუთზე ანგარიში ისევ გათანაბრდა – 23:23.

დანია ისევ გავიდა წინ 3 ბურთით, როდესაც ლანდინმა ზედიზედ მოიგერია 2 ბურთი. მასპინძელთა ლიდერი, მიქელ ჰანსენი ხორვატებს პერსონალურად ჰყავდათ აყვანილი, მაგრამ ჰანსენი უპრობლემოდ არიგებდა საგოლე პასებს – 26:23, 52 წუთი.

ხორვატიას კიდევ მიეცა შანსები – 54 წუთზე დამირ ბიჩანიჩმა სხვაობა მინიმუმამდე შეამცირა, ხოლო ქრისტიანსენი ორწუთიანში წავიდა, მაგრამ ლანდინმა ისევ მოიგერია ზედიზედ 2 დარტყმა. მოგენსენმა და სვანმა სხვაობა ისევ აიყვანეს 3 ბურთამდე – 28:25.

და ბოლო შანსი – დუვნიაკმა ერთი გოლი გაქვითა (26:28), ხორვატებს კიდევ ერთხელ მიეცათ რიცხობრივი მეტობა და ორი შეტევის დროც ჰქონდათ – დარჩენილი წუთზე მეტი იყო, მაგრამ ხორვატიამ იქვე დაკარგა ბურთი და თამაშის ბედიც აქ გადაწყდა – რენე ტოფტმა სწრაფ შეტევაში გაიტანა და ჰორვატის ბოლო გოლს აზრი აღარ ჰქონდა – 26:29.

26 იანვარს ფინალი 20:30 დაიწყება, ხოლო 18 საათზე ბრინჯაოს მედლისთვის ესპანეთი და ხორვატია ითამაშებენ.