08/06/14 ბრძოლა მსოფლიო ჩემპიონატის 9 საგზურისთვის

გაიმართა 2015 წლის მსოფლიო ჩემპიონატის შესარჩევი მატჩები ევროპის ზონაში. პლეიოფის სტადიაზე 18 გუნდი დაწყვილდა და 9 საგზურისთვის იბრძვის. ამ უქმეებზე პირველი მატჩები იყო.

ლიტვის ნაკრები, რომლის კვალადაც პირველ ეტაპზე საქართველოს ნაკრებმა მეორე ადგილი დაიკავა, პერმში დამარცხდა რუსეთთან – 22:30. ლიტველებს დაემატათ ესპანეთის ლიგაში მოთამაშე აიდენას მალაშინსკასი, რომელსაც პირველ ეტაპზე არ უთამაშია. გუნდის ლიდერმა 6 გოლი გაიტანა, მაგრამ თავისიანებს ვერ უშველა.

პირველი შესარჩევი ეტაპის გამარჯვებული 5 გუნდიდან მოიგო მხოლოდ ბოსნიის გუნდმა, რომელმაც შინ 33:32 დაამრცხა ისლანდია. წააგეს რუმინეთმა, საბერძნეთმა და სლოვენიამ.

პლეიოფში ყველაზე ძლიერი წყვილი პოლონეთ-გერმანიაა. პირველი მატჩში, გდანსკში, პოლონელებმა 10 000 მაყურებლის თვალწინ 9:12 წააგეს პირველი ტაიმი, მაგრამ დასრულებამდე 5 წამით ადრე მარიუშ იურკევიჩმა 25:24 მოაგებინა მასპინძლებს.

14 და 15 ივნისს საპასუხო მატჩებია, რის შემდეგაც მსოფლიო ჩემპიონატის 9 მონაწილე გამოვლინდება. ევროპიდან საგზური უკვე მოიპოვეს 2013 წლის მსოფლიო ჩემპიონმა ესპანეთმა, ასევე 2014 წლის ევროპის ჩემპიონატის დანარჩენმა სამმა ნახევარფინალისტმა – საფრანგეთმა, დანიამ და ხორვატიამ. მსოფლიო ჩემპიონატი 2015 წლის იანვარში გაიმართება ყატარში.

სეზონს სანაკრებო მატჩებით ასრულებენ ქალებიც – ისინი იბრძვიან 2014 წლის ევროპის ჩემპიონატის საგზურებისთვის. სულ 7 ჯგუფია, ფინალში 2-2 გუნდი გადის. ამ მომენტისთვის საგზურები უკვე გაინაღდეს დანიამ, საფრანგეთმა, მონტენეგრომ, შვედეთმა და რუსეთმა. კვალიფიკაცია 15 ივნისს დასრულდება, ფინალი დეკემბერში გაიმართება უნგრეთსა და ხორვატიაში.

ფოტო: პოლონეთი – გერმანია

მსოფლიო ჩემპიონატი 2015. კაცები. შესარჩევი ტურნირი

ევროპა. პლეიოფი. პირველი წრე. 7-8 ივნისი

რუსეთი – ლიტვა 30:22

პოლონეთი – გერმანია 25:24

რუმინეთი – შვედეთი 24:25

საბერძნეთი – მაკედონია 25:27

ავსტრია – ნორვეგია 28:26

ბოსნია – ისლანდია 33:32

სერბეთი – ჩეხეთი 23:15

უნგრეთი – სლოვენია 25:22

მონტენეგრო – ბელარუსი 28:27

საპასუხო მატჩები 14-15 ივნისს

Leave a Reply